IL CHOR
NOSSA HISTORIA
1999 – Cu tut ha entschiet
Ella magnifica baselgia da pelegrinadi «Nossadunna dalla Glisch» sur Trun ha il chor «Cantus Firmus Surselva» ch’era vegnius fundaus la fin stad dau il november 1999 siu emprem concert. La baselgia era fullanada – ins era fetg spannegiai tgei ch’il pianist e dirigent indigen da 23 onns Clau Scherrer metti en pei cun cantaduras e cantadurs da «sia» val. Gia suenter quei emprem concert eisi stau clar: el tschiel musical grischun ei ina nova steila ida si. Spert ha ella splendurau adina pli e pli clar e sia tarlischur ha glischau suls cunfins dil cantun ora.
2009 – 2019
Gia in onn suenter sia fundaziun ha il chor mess in ulteriur segn d’exclamaziun cun la representaziun «Ein Deutsches Requiem» da Brahms en la versiun da Londra. Ei suondan il program «Derungs & Debussy» cun canzuns romontschas e franzosas ed in concert cun motettas da Bach e Brahms. All’exposiziun naziunala «Expo.02» a Yverdon ha il «Cantus Firmus Surselva» representau il cantun Grischun. Duront ils emprems diesch onns da sia existenza ha il chor menau si ulteriuras ovras grondas, sco per exempel la «Missa in Angustiis/Nelsonmesse» da Joseph Haydn, il «Requiem» da Wolfgang Amadeus Mozart, «Die Schöpfung da Joseph Hayden» ni la «Joahnnespassion» da Johann Sebastian Bach. Dasperas ha il chor giu in viva activitad da concert cun programs da canzuns en ed ordeifer il Grischun ed ha publicau plirs discs cumpacts. Per siu giubileum da 10 onns igl onn 2009 han las cantaduras e cantadurs regalau a sesezs e lur publicum il program «Batterdegls – Augenblicke» cun ovras a capella da 10 onns «Cantus Firmus Surselva». Per quest intent ein novas cumposiziuns vegnidas incumbensadas ch’ein medemamein vegnidas perpetnisadas sil disc cumpact da giubileum cul medem num.
Duront il secund decenni da sia existenza ei il «Cantus Firmus Surselva» sededicaus regularmain al cant romontsch. Las cumposiziuns melodiusas dils numerus cumponists indigens, magari era levamain melanconicas, duessen buca ir en emblidonza e la tradiziun duess vegnir tgirada e vivida vinavon. Era cumposiziuns novas ein vegnidas integradas el repertori per mantener e promover la cultura da musica romontscha. Dasperas ha il chor brigliau cun representaziuns reussidas da Brahms «Ein deutsches Requiem», da Felix Mendelssohn «Elias» (2017) e da Gioacchino Rossini «Petite Messe solennelle» (2019).
2020 fin oz
Ils concerts da Nadal 2020 e dalla «Matthäus-Passion» da Bach 2021 ein vegni ruinai entras corona. Tuttina ei il chor, sche las autoritads han lubiu ei, adina puspei sescuntraus ad emprovas communablas – cun fetg gronda distanza denter cantaduras e cantadurs e cun tests da corona el liug. Durtont la secunda mesadad digl onn 2022 ha ei dau entgins concerts pli pigns. La primavera 2023 ei stada sut l’enzenna dalla cultura da cant romontscha cun presentaziuns communablas dils treis chors grischuns «Chor viril Ligia Grischa», «Chor grischun da giuvenils» e «Cantus Firmus Surselva» a Cham ed a Cuera, avon ch’ei va actualmein per elavurar ils concerts da Nadal 2023.