NIES DIRIGENT
In Grischun per la cultura da musica grischuna – denton buca mo: cun Clau Scherrer posseda la scena da musica e cant dil Grischun in musicist cun grondas habilitads musicalas che tonschan era lunsch suls cunfins dil cantun ora. Clau suna, diregia ed interpretescha sil pli ault nivel. El gida e sustegn era adina puspei chors laics dils differents vitgs da sia patria. Quei ei in dun zun special che fa el ordvart simpatics. Per tut quei essan nus zun engrazieivels!
«Clau Scherrer ei il dirigent il pli talentau dil Grischun che semida en in saltunz cu el diregia. El posseda ina voluntad stinada per la precisiun ed ina gronda forza da motivar che dat sustegn e direcziun al chor.»
Dr. Giovanni Netzer, intendant dal festival cultural «Origen»
Curriculum Vitae
Clau Scherrer entscheiva siu studi da musica a sogn Pieder (Feldkirch) e vegn instruius al clavazin da prof. Ferenc Bognar, nua ch’el fa siu diplom da concert cun distincziun. Silsuenter cuntinuescha el ils studis all’Academia da musica a Basilea tier prof. Jürg Wyttenbach nua ch’el terminescha igl onn 2002 cun distincziun. Igl onn 2004 terminescha el siu studi sco dirigent da chor all’Academia da musica a Basilea (cun distinziun).
Gia sco giuven pianist retscheiva el differents premis: Il premi da promoziun dil cantun Grischun 1989 (fargliuns Scherrer); premi dalla CRR 1992; differentas distincziuns sco partenari al clavazin a caschun dalla concurrenza naziunala dall’Austria «Prima la musica»; emprem premi dalla concurrenza «Bösendorfer»; 2. premi dalla concurrenza da solists «Prima la musica» dall’Austria. Igl onn 2002 survegnan ils fargliuns Scherrer il premi da cultura dalla vischnaunca da Trun. Dus onns pli tard (2004) retscheiva el il premi principal dalla fundaziun Eljette von Karajan. Igl onn 2009 ei el il purtader dil premi SRG.R ed igl onn 2016 survegn el in premi da renconuschientscha dil cantun Grischun.
Naven da 1998 entochen 2005 surpren Clau Scherrer regularmein la correpetiziun al Teater da Vorarlberg a Bregenz. El frequenta cuors da meister tier Ferenc Rados.
Sco dirigent e pianist ha el luvrau cun La Scintilla (Opera da Turitg), Concerto Stella Matutina, Südwestdeutsche Philharmonie Constanza, Barockorchester Capriccio Basel, Kammerphielharmonie Graubünden, Staatsphilharmonie Oradea, Staatsphilharmonie Klausenburg, Orchester le Phenix, Streicherakademie Bozen ed auters.
Il chor cantus firmus surselva vegn fundaus da Clau Scherrer igl onn 1999 cun cantadur(A)s dalla Surselva. Igl onn 2004 retscheiva cantus firmus surselva il premi CRR (Cuminanza Radio e Televisiun Rumantscha). 2015 realisescha Gieri Venzin in film che documentescha il luvrar e patertgar da chor e dirigent. Quei film da 70 minutas ei vegnius emess sin SRF1, TSR e 3SAT. 2016 cumpara in disc cumpact en collaboraziun cun Maria Riccarda Wesseling.
Naven da 2004 tochen 2015 diregia Clau Scherrer il Chor Viril Lumnezia.
El ei dirigent dil Chor Svizzer da Giuvenils naven da 2008 – 2010. Dil 2010 – 2023 ei Clau Scherrer Kapellmeister en claustra da Mustér e dapi 2017 meina el regularmein ils concerts dil Collegium Musicum Bruneck el Tirol dil sid. Dapi 2018 ei el menader dalla Scola da musica Surselva. Clau Scherrer ei iniziant e president dalla «Uniun chanzun rumantscha». 2019 ha igl emprem «Festival da la chanzun rumantscha» liug a Trun sut sia bitgetta. Igl atun 2023 surpren el l’instrucziun «cant d’ensemble e chor» en la Scola aulta da musica Stella el Vorarlberg.
Dapi 2005 ei Clau Scherrer il menader musical tier Origen, nua ch’el diregia mintga onn differents concerts e premaudiziuns cun igl Ensemble Origen ni cul Chor Origen.
PREMIS E DISTINCZIUNS
- Premi da promoziun dil cantun Grischun (1989/Fargliuns Scherrer)
- Premi Lions per giuvens musicists dalla scola da musica Surselva (1990)
- Premi CRR (Cuminanza rumantscha Radio e Televisiun, 1992)
- Diversas distincziuns sco partenari da clavazin tier la concurrenza federala austriaca «Prima la Musica», gl’emprem premi tier la concurrenza da Bösendorfer sco er il segund premi tier la concurrenza federala austriaca “Prima la Musica” ella categoria da solo (1996)
- Premi da cultura dalla vischnaunca da Trun (2002)
- Ge’oun 2004 survegn Clau Scherrer il premi prestigius Eliette von Karajan sco renconuschientscha per sia lavur prestada en ed ordeifer il Grischun, ma era sco promoziun per ses plans musicals dil futur.
- Igl onn 2009 vegn surdau ad el il premi dalla SRG.R.